Aalborg i Danmark kunne by på ein eineståande og svært spektakulær flåte av stolte seglskip frå nær og fjern, då Tall Ships´Race 2004 besøkte byen 29.7 - 02.08. 

Scandion tok turen til Aalborg for å oppleve over 80 stolte og vakre seglskuter på nært hald. 

Blandt dei skip som besøkte Aalborg, var nokre av dei mest imponerande i heile verda. Også nokre av verdas eldste skip er med, - skip som har sett verda forandre seg opp gjennom åra. 

Sedov, verdas største seglskip, var enorm både utvendig og innvendig. Ombord i skipet fant vi fort fram til museet med utstilling av pokaler, utmerkingar og historiske informasjon. 

Statsraad Lehmkuhl opplevde vi som det desidert flottaste og best vedlikehalde seglskipet. 

Christian Radich ruva også godt på hamna, og gjorde seg spesielt bemerka med eige kor som framførte sjømannsviser til 
akkompangement av fleire trekkspelarar. 

Økonomien til dei norske seglskipa såg ut til å være god. Av dei største skipa var desse dei einaste som ikkje tok betaling for eit besøk ombord. Vanlig pris for eit besøk ombord på dei andre skipa var 20 kroner (svenske). 
For fem år sidan var Aalborg slutthamn for seglasen. Den gong samla seglskutene omkring 700 000 besøkande. 

Seglskipa låg ved kai på begge sider av Limfjorden, og ein endelaus straum av folk kryssa Limfjordbrua frå tidleg morgon til seine kvelden - til og frå dei mange seglskipa. 

I strålande solskinn kunne små og store kose seg heile dagane på hamna. Utallige underhaldningstilbod og serveringstader langs heile hamneområde gjorde dagane til ein folkefest av dimensjonar. 

I mange år var denne kappseglasen over heile verda kjendt som "Cutty Sark". Frå og med sommaren 2004 er Sail Training International (STI) den nye arrangøren, men formålet er framleis å gje glede og utfordring til unge frå ulike nasjonar. 

Då dei store skuleseglskipa si ære var i ferd med å ta slutt på midten av forrige århundre, tok London-advokaten Bernard Morgan i 1955 initiativ til ein kappseglas for dei flotte seglskipa. 

Året etter var 20 skip frå i alt 11 land klar for å stevne ut på den første kappseglasen - som i media fekk tilnamnet Tall Ships´Race - dei høge skipas kappseglas. Seglasen vart ein suksess, og det vart bestemt å arrangere fleire race. 

Opp gjennom åra vaks seglasen raskt i omfang med årleg deltagelse av mellom 80 og 120 av verdas største seglskip. 

I 1972 fekk arrangøren STA (The Sail Training Association) ein sponsoravtale med Cutty Sark Scots Whisky, og seglasane fekk deretter namnet Cutty Sark Tall Ships´Race. 

Då Whiskyfirmaet trekte seg ut av arrangementet for nokre år sidan, gjekk ein tilbake til det opprinnelege namnet Tall Ships´ Race. 

Tall Ships´Race handlar ikkje berre om konkurranse, men og om kameratskap, samhold og internasjonalt samarbeid. Her får unge mennesker i alderen 15-25 år frå alle nasjonar og ulik bakgrunn anledning til å arbeide saman og oppleve spenning og utfordring på havet. 

Det blir lagt stor vekt på å bryte grenser, og den eigentlege konkurranse handlar om internasjonal og kulturell forståing deltakarane mellom. 

Seglasen er inndelt i tre etappar, der dei to Antwerpen - Aalborg og Stavanger - Cuxhaven er kappseglaser. 

Etappen mellom Aalborg og Stavanger er ein vennskapsseglas, der besetningsmedlemane byter skip med det mål å styrke dei internasjonale banda. 

Det skipet, som etter seglasen mottek Tall Ships´ Race-prisen, er ikkje det raskaste skipet, men derimot det skip som har gjort mest for internasjonal forståelse og vennskap. 

Påmeldingslista for årets race viser at Aalborg er den hamna som fekk besøk av flest skip - 82 var påmelde. Skip til Antwerpen, Stavanger og Cuxhaven ligg på mellom 60 og 72 skip.