Som vanleg var Brekke kyrkje fullsett ved den årvisse julekonserten siste søndagen i advent. Julestemning var det frå første tone. Barnehagane og elevar frå 1. - 3. klasse sang adventssang og tende dei fire adventslysa. 

Dei fylgde så opp, med stor innleving, med eit par julesangar, før Brekke Mannskor overtok med heilt andre tonar. 

Mange av elevane ved Brekke skule er med i Musikk- og kulturskulen. Til konserten i kyrkja hadde dei øvd inn eit program med kor og deltakarar på orgel og gitar. 

Brekke Kyrkjesonggruppe gav oss vakker, fleirstemt sang før presten, Jens Linde, heldt ei kort andakt og avslutta med solosong. 

Anja Reknes sang så Julekveldsvisa reint og klart før arrangøren, Brekke Skulemusikkorps avrunda konserten med nydeleg og kraftfull korpsmusikk. På "Fager er jordi" sang publikum med, og kyrkja var fylt med jul! 

Dei som ikkje hadde julestemning før dei kom i kyrkja fekk den nok i løpet av dei knappe 2 timane med ulike artistar frå nærområdet.