Brekke Skulemusikkorps vann 2. divisjon i Sogn og Fjordane Meisterskapen 2006 med 95 poeng, framfor Solund og Vassenden. Byrknes skulemusikk vann 3. divisjon med 94,5 poeng, 1/2 poeng framfor Kalvåg.  Florø var åleine i 1. divisjon, og oppnådde 94 poeng. 

Vandrepokalen i klassen for brass band vert vunnen når eit korps har 3 napp i den, og det korpset som har høgast poengsum, uansett divisjon, får napp. 

Før årets konkurranse hadde Florø og Brekke 2 napp kvar, så spenninga var stor då Florø, som siste korps, sin poengsum vart opplesen. 

Som du ser hadde Brekke 1 poeng meir enn Florø, og dermed har korpset fått vandrepokalen - ein kornett - til odel og eige. 

Inger Marie Håheim Tynning var berre eit stort smil i går kveld etter at begge korpsa ho er dirigent for gjorde ein kjempeinnsats. 

For Brekke skulemusikkorps var dette den 10. strake sigeren på rad i meisterskapen. 

Litt stas må det gjerast på musikantane som reiste til Førde og spelte så kjempebra i fylkesmeisterskapen! 

Ordførar Trude Brosvik møtte begge korpsa på skulen i Brekke for ei lita offisiell mottaking. Det er jo litt spesielt at både Brekke og Byrknes har same dirigent, så det er fint å få alle samla for ein gangs skuld. 

Alle tok turen innom Brekke skule og idrettslaget spanderte brus, korpset pølser med brød. Ordføraren hadde kansellert fjellturen for å vere til stades og gjere stas på dei to dyktige korpsa. Ho var svært fornøgd med at me har så mange flinke musikantar, og ei verkeleg eldsjel i dirigenten for begge korpsa - Inger Marie H. Tynning, i tillegg til det gode støtteapparatet rundt medlemmene. 

Mange foreldre møtte opp, flagget gjekk til topps og jubelen stod framleis i taket (som den har gjort sidan resultata vart kjende!) både blant korpsmedlemmene og dei andre frammøtte. 

Ingeborg Evensen las dommarkommentarane for Brekke, og Jostein Birknes tok seg av Byrknes sine. Her var det mykje ros og gode råd. Dommarane ynskte å få høyre denne korpsmusikken også utanfor fylket... Når ordføraren ymtar om nye mål, kan vel det vere noko å tenkje på.......